Minbya Ah Council Ralhraang Tilawng Pahnih AA Nih An Kah I Pakhat A Rawk

Minbya Ah Council Ralhraang Tilawng Pahnih AA Nih An Kah I Pakhat A Rawk; Ralhraang Nih Vanlawng, Tilawng Le Ke Ralkap He Hmainawr In An Kah Hna Ca Ah Khuami Harnak An Tong

Rakhin ram, Minbya peng, Tatpon chaung, Chaungsi pawng ah nihin September 26 zinglei in Council ralhraang le AA kar kahdohnak fak a chuak i ralhraang nih vanlawng, tilawng le ke ralkap komh in hmainawr in an kah hna tiah kan theih.

Ralhraang Nih Vanlawng, Tilawng Le Ke Ralkap He Hmainawr In An Kah Hna Ca Ah Khuami Harnak An Tong

Pauktaw lei in a rak tum mi ralhraang tilawng pahnih cu Chaungsi pawng an phanh ah AA nih an kah hna caah kap hnih kar kahdohnak suimilaam 1 chung a chauk tiah pawngkam um khuami nih an chim.

“Pauktaw lei in a ra mi Navy tilawng cu AA nih an kah hmasa. Pahnih an si i pakhat cu pinlei khua ah a taang. Cuka in cun Navy nih an rak kah hna. Tlawmpal ah vanlawng pahnih in an rak kah than hna. Navy tilawng cu a rawk ngai. Meikhu a chuak mi zong kan hmuh” tiah a chim.

Cu hnu ah ralhraang nih vanlawng pahnih in Balikauh, Setkelay, Tatponechaung, Chaungsi khua pawng ah an rak kah hna i bomb an thlak ruang ah pawngkam um khuami cheukhat hliam tuar an um tiah kan theih.

Cu kahdohnak a chuah hnu suimilaam tlawmpal a rauh ah Minbya khua chung council ralhraang Kha Mah Yah 379, 380, 541 battalion 3 hrambunh hna nih kahdohnak a chuahnak khua lei ah hriam ngan an kah. Minbya Chaklei ah a um mi Laymyochaung, Phontharchaung lei zong hriam ngan in an kah tiah tualchung mi nih an chim.

Council ralhraang nih an hriam ngan kah mi ruang ah nau pawi lio nu pakhat le ngakchia pahnih hliam tuar an um tiah kan theih.

“Kahdohnak hi Minbya peng Tatpone khua le Kaunglaungchaung khua pawng ah a si. Atu tiang ah cun naupawi lio nu pakhat tel in hliamtuar dang zong an um. Atu hi ralhraang nih Cintaung Chaklei in an kah hna. Thil sining a tha lo” tiah Minbya tualchung mi pakhat nih a chim. Ref: Khit Thit Media

Leave a Comment

error: Content is protected !!