Min Aung Hlaing- Kan Cozah rum nak si lo in kan mipi rumnak caah kan tuan

Nay Pyi Taw i phaisa lei kong ah Kawl ralkap luban pawl cu meeting an tuah hna i Min Aung Hlaing nih a tang lei bantuk in a chim.

“Kannih cu ramkhel party cozah kan si lo. Rampi a tungmer tu ding can karlak cozah kan si. Kan cozah rumnak le thanchonak caah kan tuan awk a si lo i kan ram le kan mipi rumnak, kan thazang chonak ding ah rian a tuan tu ding kan si.

A tu kan ram hi sipuazi a tla tuk. Mipi riantuan loin tampi kan um hna. A si khawh chung in phaisa hman kan i sum a hau. A bik in ramdang ah thil cawk kan i sum a hau i ramchung ah cawk awk thami cu ramchung ah cawk kan i zuam a hau” tiah Min Aung Hlaing nihcun a chim.

Min Aung Hlaing hi NLD cozah chan lio ah khan Kawlram President si hi a rak duh tuk ti a si. NLD cozah chan lio ah khan President rian ka kian uh a rak ti bal. NLD nih an rak duh lo.

Kum 2020 thimnak ah vote thlak ai palhmi a tamtuk tiin Min Aung Hlaing nihcun uknak a lak. A tu ahcun a mah tein Kawlram President rian cu a van i khinh taktak ko cang.

Min Aung Hlaing nih uknak a lak hnu ah kum khat hmanh a tlin hlan ah minung tamtuk ramchung mi an nunnak a liam. An mah ralkap bak nih minung 1000 leng an thah hna. Raltuknak hmun ah PDF le hriamtlai zong tampi an thi. An mah ralkap le palik zong tampi an thi. Dalan zong tampi an thi.

Min Aung Hlaing nih uknak a lak in nihin tiang ahhin ral ruang lawng bak ahhin Kawl ralkap a tlawm bik minung 15000 cu an thi cang lai. PDF le hriamtlai lei in a tlawmbik minung 200 cu an thi ve cang lai dah. Hriamtlai lo mipi lei in sandah piahnak thimi he relchih in minung 1500 cu an thi cang lai.

Kawlram covid ruang ah khan minung 50,000 cu an thin lai tiah zumh a si. Min Aung Hlaing nih uknak a lak ruang ahhin a thi lo ding mi minung 6000 hrawng Kawlram chung ummi kan thi cang tinak a si.

Leave a Comment

error: Content is protected !!