Kawl ralkap hriam zuarh ti lo ding in UN palai U Kyaw Moe Htun nih a hal

Kawl ralkap hriam a zuarhmi ram hna nih Myanmar ram chungah hriam luhternak dir ter ding in UN Permanent Representative U Kyaw Moe Htun nih a hal.

Kawl ralkap hriam zuarh ti lo ding in UN palai U Kyaw Moe Htun nih a hal

October 11 New York khua ah an tuahmi a voi 77 nak UN General Assembly ah U Kyaw Moe Htun nih atu bantuk in a chim hi a si.

Myanmar ram mipi hna nih vawlei cung ram pawl sin ah bawmhnak an hal mi kha i theihter loin SAC kha hriam a bawm mi ram an um, cu hriam pawl hmang in mipi an kah thah, suar an buar tiah a chim.

Sagaing ramáš­hen, Tabayin peng, Latyatkone khua September 16 ah SAC ralkap vanlei kahdohnak ruangah hngakchia 7 telh in minung 13 hrawng an thihnak le Myanmar ram mipi tampi kan thihnak kong hi Kawl ralkap hriam kan zuarh lo nak hnga a biapi mi biakhiahnak a herh tiah a chim fawn.

Kawl ralkap hriam a zuarh rih mi ram hna cu ralkap nih sualnak ngei lo mipi a thahnak chung ah telh nan si ve lai tiah UN palai U Kyaw Moe Htun nih a chim.

Myanmar ram nih “Nuclear Disarmament” tlangtar in kum fatin a phuan mi kha atu zong ah kan phuan rih lai, Myanmar ram ah Chemical Weapons hmannak pawl kha fak piin kan cohlang lo i a zii kan zut piak hna u tiah a chim fawn.

Cun October 10 ah UN Headquarters ah tuah miphun cungah buarmi sualnak pawl he pehtlai in vawlei cung ram pawl tonnak meeting zong ah U Kyaw Moe Htun nih ICJ le ICC nih Myanmar ram mipi hna an au thawng kha ngaih piak in le temhinnak a tuar mi hna caah tlukruannak hmuh piak ding in a hal.

Mipi a kan that lengmang tu SAC cu China, Russia le Belarus hna nih hriam an zuarh lengmang. Credit-Thechinlandpost

Leave a Comment

error: Content is protected !!