Kalaymyo Laimi i Zohkhenhnak Bu ca ah pekchanh mi motor ralhraang nih an chuh hna

Kalaymyo Laimi i Zohkhenhnak Bu ca ah pekchanh mi motor ralhraang nih an chuh hna

Kalaymyo Laimi i Zohkhenhnak Bu (LZB) ca ah Lunghau khua chuak Pu Khen Kil Lian nih a pek chanh mi motor cu September 1, Shwebo khua an phanh ah Council ralhraang pawl nih an chuh hna tiah pechantu chungkhar sin in kan theih.

“Ralhraang nih motor sticker ah Lai timi min an hmuh mi kha an rem lo ca ah an chuh mi hna a si. September thla ni 1 ah khan a si cang i an kan pek than rua lai tiah ruah a si nain atu tiang an la kho ti lo,” tiah a pechantu chungkhar in pakhat nih THP ah a chim.

Ralhraang nih chuh mi motor cu Pu Khen Kil Lian nih Kalaymyo Laimi Zohkhenhnak Bu (LZB) ca ah Kyats sing 100 in a cawk mi a si i, an cawknak Yangon khua in Kalaymyo lei an tlunpi lio ah an tlaih hna hi a si tiah kan theih.

Motor a mawngtu ah an hlan mi pa cu Kawl miphun a si i ralhraang nih an thlah than tiah theih a si.

“Laimi na si lo cu na van a tha, Laimi si law kan in kah lawlaw hnga tiah an ti. Motor mawngtu pa cu a zaam cang,” tiah a cunglei langhter mi nih a chimchap.

Hmanthlak: Pu Khen Kil Lian nih a pekchanh mi motor sticker benh hlan hmanthlak a si. Credit-TheHakhaPost

Leave a Comment

error: Content is protected !!