Chin Miphun Dihlak Sinah Ralrin Peknak

Ramchung ramleng Chinmi dihlak thazaang um-ek chuah in ralhrang kan doh lio can asi.

Thisen le nunnak he ral lian kan do lio ah mah pumpak pawcawm nak kawl le lar duh ruang ah biakin kip I phaisa hal in Refugee ram dang pem kong a aupi mi cu miphun dothlen nak ah mizei ruaram lo “DALAN” he emkhat nan si tiah tuanbia nih record an tuah hna lai.

Kawl ralhrang a do mi poh le CDF, CNDF, KKG CDF le CNA a dirpi mi poh nih mah hi rak share cio uh. Nan pawngkam ah kha bantuk minung rak iralring cio hna uh. Credit: Salai Bawi Lian Mang


Relchap:

India le China nih Min Aung Hlaing an i cuh. Ho dah ai tei te lai. An mawh veve lo. An i cuh awk te a si.

India cozah nih Myanmar ram uknak a la tu Min Aung Hlaing cu Indepedence day ah an sawm ti a si caah Min Aung Hlaing cu Delhi ah a kal kho men. A kal lai ti zong zumh a um bak. A ruang cu vawlei cung ram tampi nih an hlawt lio ah sawmtu a van ngeih cu Min Aung Hlaing nih vanthat a ti men ko lai.

India cozag cu democracy ram pical a si nain NUG thazang pe loin ralhrang thazang a petu a si. Ralhrang nih uknak an lak hnu ah ralhrang sin zong ah an tlawn ve. Ralhrang he biaruahnak zong an ngei.

China zong hi Min Aung Hlaing a bawmtu bak an si ve. Asean ram hna nih Min Aung Hlaing cu dotla ah an cohlan khawhnak lai China biatak tein ai zuam nain a hlawh a tling lo. Ralhrang biatak tein a dirkamh hna.

China le India nih Min Aung Hlaing an i cuh hi an mawh lo. Kawlram an i cuh bia kha a si. NLD uknak lio zong ah khan India le China cu Kawlram ai cuh pengmi an si. A tu Min Aung Hlaing nih uknak a lak than i a cak lei poh ah India le China cu an tang ko.

Kan theih bantuk in India le China cu ramri ruang ah kum fatin a buaimi ram an si. Uico le Maheh bantuk in ai huami an si caah an karlak ah a ummi Kawlram hi an nih ram pahnih caah cuh a biapi taktak a si ve.

India nihhin Kawlram ah China nih hmunhma tampi a lak sual lai ti a phang. China nih Kawlram ahhin India nih hmunhma tamtuk a lak sual lai ti a phang ve. Sipuazi ah siseh ral lei kong ah siseh an kar lak ah hmunhma tha a simi Kawlram hi an caah a biapi taktak mi a si.

India nihhin zeitluk in dah Kawram ah rian ka tuan khawh lai ti ai zuam. China zong nih Kawlram ah zeitluk in dah rian ka tuan khawh lai timi ai zuam ve. An mah pahnih an i ngairnak caah Kawlram hi an hmanmi a si.

India cozah nih Kaladan projet a hun tuah. Kawlram le India cu tilong le Motor in fawi tein i tlawnkai khawhnak ding Paletwa ah a hun tuah. Cucu AA hmang in China nih hnahnawhnak a hun pek. China nih AA kha tlawmpal a hun bawmh hna i Kalandan projet kalpi kho lo ding in AA nih an tuah. Ramri ah India ralkap nih AA zong cu an kah bal ve hna.

Kawlram cu sau tuk ralkap uknak tang ah a ummi an si cang ruang ah ralkap bawi lung tluanh khawh poh kha China le India nihcun an i zuam. India le Myanmar ramri ah a ummi hriamtlai zong India ralkap nih Kawl ralkap cu a rak kah piak tawn hna. CNA camp zong India ralkap nih an rak kah bal.

China nih Shan ramkulh le Kachin ramkulh lei ah a nawlngeihnak a power cak tuk in a hman bantuk in nitlak lei Rakhine le Chin, Sagaing ramthen hna ah a nawlngeihnak power cak ngai in a hun hmanh timh khi a si.

China le India hi cu an mah pahnih an i ngiarnak caah Kawlram ahcun a cak lei poh ah an tang ko lai. Ralkap nih uknak an lak si le ralkap lei ah an tang lai i mipi nih uknak kan lak si le mipi lei ah an tang than ko lai.

A tu Min Aung Hlaing nih Kawlram uknak cu a tlaih lio a si caah cansau pi a tlaih rih lai ti an zumh. Mahhi chung ahhin India le China nihcun Min Aung Hlaing lung tluanh kha an i zuam i an i cuh mi a si.

Leave a Comment

error: Content is protected !!