Putin Kong A thei fiang tu Thiamsang hna nih an chim mi

Zan tlai hnu catial -Russia nih Ukraine tuk a thok in tu tiang ah, neuclear hriamnam hmang kho an sinak kong voi tam ngai an chim cang.

Nai bik, President Putin nih Ukraine tuknak caah ralkap ting 3 tluk hmannak nawl a chuah lio zongah khan “kan ram venhimnak ding caah Russia nih a ngeihmi hriamnam dihlak a hman ko lai” tiah a chim chap..

Khat lei ah, China nih Taiwan hi zuuri mi ngiar in a ngiar cuahmah. Ni fatin drone le ralkap hriam phun khat khat Taiwan ram chunglei ah a thlah hnawh peng hna. An thin hunter i anmah Taiwan nih an kut zo hmaisa hnu ah, an kan ti hmaisa ruangah ti in tthuat ve lawng khi an hngahmi a tang cang.

US nih heh lawh tiah khaam aa zuam i Taiwan na tuk ahcun US nih ralkap thazaang in kan bawmh hna lai, tiah an ti..

Tuzan ca ka relmi pakhat nihcun “US nih vawlei ah neuclear ralkap chuahnak ding lam hmun hnih in a pemh cuahmah; Ukraine le Taiwan dirpi nak in” tiah a ti.

Putin lungput fiang tein a theimi thiamsang hna nih “Putin cu chuahnak ngei loin a lungkua i nam chih ahcun amah rawh zong zeihmanh ah rel loin neuclear bomb cu a hman ko lai ee” tiah an ti ve..

Cu bantuk thawngpang in a khatmi vawlei ahhin zeitin hen hnangam te cun kan um khawh hnga???

Kanmah ram ral, ralzam, harsatnak a si rih aw…

Taksa in zeitluk lung tthawngmi le ral tthami hna hmanh, tu lio ahcun an hna a ngam kho cio lo; lungrethei le sivaang in an um cio ko!

Nain Jesuh nih “daihnak kan chiah tak hna; vawlei nih an pekmi daihnak phun a si lo” (John 14:27) tiah a kan timi cu hi bantuk caan ca ahhin a si cuh…

Buainak a um lo lio i lung dai le hnangam tein um nak caah Jesuh pekmi daihnak hman a hau lo; mah tein dai cia a si. Nain amah tein dai ciami zeihmanh a um ti lo le a rak dai tuk tawnmi lungthin a buai cikcek, a hnawk cikcek hnu ahhin pei Jesuh pekmi daihnak cu kan hman lai cu..

Lungrethei, lung buai le thinphang in aa hngilh kho lomi nan um sual maw?

Jesuh pekmi Daihnak cu na lungthin dihlak in rak i lak law, atu ah hmang ve hmanh; na lungthin a dai lai i keimah bang na hngilh a taw tuk ve ko lai.Mangtha dih ulaw…Crefit-Pastor Hrambik Lian

Leave a Comment