Norway Khrihfabu ah ka ttuan hnu in ka hmuhmi kan culture aa dannak pakhat

Lai culture ahcun meeting ah holh tuk hi mifim ah kan hmu lo. A bikin kanmah nakin ngakchia deuh nih a holh tuk ahcun luarpar a kai mi ah kan ruah i “aho ah dah aa rel” timi ruahnak kan ngei. A sining/position zong kan upat piak kho lo. A holh lomi, dai tein a ummi tu hi mifim ah kan ruah.

Norway Khrihfabu ah ka ttuan hnu in ka hmuhmi kan culture aa dannak pakhat:

Norway culture ahcun meeting ah holh le ruahnak cheuh hi mifim ah an hmuh lengah attuanmi a rian ah a lung apek i tthatein khua a tuak mi si, vision angeimi si tiin an hmuh. Ka khat hmanh a holh lomi cu mi molh zoh in an zoh ko. Zeihmanh vision angei lomi, ruahnak pakhat hmanh angei lomi le a rian cungah pakhat te hmanh khua a tuakmi um lo tiah an ruah.

Laimi culture ah attha lo ngaimi cu meeting ah ruahnak cheuh loin meeting dih hnu ah alengah kan bia a tam tawn i buainak tu hi achuak. Taushetsplikt kan ngeimi zong zei ah kan rel ton lo i meeting chungah kan ceihmi, member pakhat kong sensitive information zong alengah kan chuahter.

Ralkap uknak tangah kum tamtuk kan rak um caah maw si hnga, hierarchy uknak system le dictatorship uknak nih kan thinlung tuni tiang akan uk caah si lai tiah ka hmuh. Mah nak in ngakchia mi le position a hme deuhmi cu kan upat kho lo i meeting zongah kan ruahnak kan cheuh kho lo. Cu caah aleng tu ah, kan innchungkhar le kan hawi le sinah kan chuahpi tthan. Cu thinlung in kan luat aherh, kan luat lo ahcun ttihnak in kan khat rih ko lai i kan duh lo takmi ralkap uknak hruainak/dictatorship hi kan theih lo karah kan kalpi mi zong kan thei kho lai lo. Normal ah kan ruah lai.

Tthancho dingah zei palhnak nih dah akan donkhan ti theih hmasa ahau. Palhnak remh loin tthanchonak cu zeitik hmanh ah kan phan kho lai lo.Credit- Naw Htoo Saw Sang

Leave a Comment

error: Content is protected !!