Nihin kan ram thilman kai cu mipi an lau ngai. A hring tlap, dollar fangkhat ah Kyat 3,700 -4000 kar a phan

Nihin kan ram thilman kai cu mipi an lau ngai. A hring tlap, dollar fangkhat ah Kyat 3,700 -4000 kar a phan, sui sing 31 a leng, diesel man liter khat ah 3335 a longh tik ah mipi an lau ngai i phan ngai awk in a vun um.

Atu ning a si ahcun a rauh hlan ah a hring 5,000 a phak ah cun chitchat a dai lai i phung ee pheng ee tiah sipuazi pi a cim a pur cang lai i zei zong vialte a dir dih lai tiah an zumh cio.

Duhsah te in mei a alh thluamah cang, hmih khawh ding ah a har ngai cang. Fawi le bai in a hmit kho mi an um lo, kut i pom in an zoh sawhsawh cio. Hiti ning in phaisa man a tum ahcun hmailei ram a that hmanh ah sipuazi, fimcawnnak le uknak a dang dang pawl kum saupi chung a rawk rih lai. Tangka man a tum timi cu thil man a kai timi he aa khat ko. Cu ti thilman a kai ahcun hmuhmi thlahlawh (income) cu nifa herhbaunak le nun khuasaknak caah a za ti lo.

kum 35 hnu 2012 ah 1 dollar ah 6 Ks chan kha an donhter. 2007 lio ram a buai lio ah saffron revolution lio ah dollar fangkhat black ah 1400 kyat a rak phan bel i 2008 ah 1150 tiang a rak tum, cozah rate fang 6 lio ah. Kyat man a rak kai deuh than nain hmuhmi le hmanmi he thilman a rak kai tuk lio ah zei tuah awk an rak theih lo i sipuazi a cim lai ti in an awlawk a chong lio ah Nagis a rak cang i ramleng in dollar bawmhnak tor le cheng a luh tik ah Kawl phaisa kyat man a vun kai than i 2009 hrawng ah dollar fangkhat ah Ks. 650-750 kar a phan i kyat man a kai than.

Cu ti cun 2010 in 2015 kar ah 1100 hrawng in a rak si i 2016 NLD a cozah a vun kai ah Kyat man a tla than i 1400 a rak phan. Cu tin cun policy a thlen than i ramdang FDI kampani pawl an luh i ramleng bawmhnak pawl Japan cozah nih 7.8 billion bawmhnak pawl a rak lut pah i dollar man Kyat 1100 le 1300 kar ah a vun si than. GDP zong a kai i $76 billion hrawng a vun phan. Nihin ah GDP growth rate hi minus 18 a si cang an ti nain cu nak in tampi a zual kho.

Hlan lio a cozah nih a ngeihmi ramdang phaisa kha an chuah kho lo pin ah dollar an ngeih mi a tlawm tuk. Baho baan ah dollar a tlawm tuk tik ah dollar account a ngeimi ramdang export a tuahmi pawl, lung a zuarmi le ramleng in hlawh a hmumi pawl an phaisa vialte baho baan thlen rate in kyat ah a thlenter dih tik hna tik ah cu sipuazi a tuahmi le ramdang hlawh a hmuhmi nih kawlram private bank pawl ah an zumhnak a tlau i ramchung ah phaisa dollar an lutter ti lo, an zumhnak a thah hna. A taktak ahcun cu zumhnak a thah hi amah le amah harnak aa pek a si.

Hi dollar man a kai kyat man a tum tuk mi hi zeitin dah a thlop lai, zeidah a tuah lai, free market economy ah maw a kal lai, free trade in maw, trade policy a thlen lai maw, monetary policy a thlen lai maw, system a thlen lai maw, uknak a thlen lai maw, baho baan nih dollar a zuar lai maw, bank interest a karhter lai maw, private baan pawl bankrupt si lo ding in a khamh tukmi a thumh lai maw, phaisa a rialmi a thumh lai maw asiloah duhsah in mi tlaih le ngeihchiah a chuh lai maw, ramdang ah phaisa a va cawi lai maw ruah awk a tampi a um i tih zong a nun ngai kho.

Russia in datsi diesel cawk ding ah committee a dirh i cawknak phaisa nuai $400 kha bank pa 8 a chuahter hna nuai 50 cio, thla 2 hrawng ramchung hman awk a zat ding ah. Cu dih cun cawknak a ngei theng ti lai lo, ramdang ah phaisa a cawi khawh lo ahcun harnak nganpi a chuah cang lai. China le Russia hmanh nih ramdang ah thil an cawk ahcun dollar an hman ve ko i kawlram ah dollar a lutmi a um ti lo ahcun hmailei a nun khawhnak a lam a har. Mipi zong kan i ralrin cia a hau. Sipuazi a cim ahcun mipi harnak le zatlaknak a chuah lai caah mipi an buai lai an tho lai i uktu zong an tla kho colh.Credit-Suihingz

Leave a Comment