Nauinn Com / Hlum Lo Ding Kilkhawi Dan (Uterine Fibroid)

Tuini cu nunau tampi ton țheu mi le țih a nung zet mi nauinn ziangtin a com thei, a hlum thei timi kan reltlang sal pei.

Nauinn Com / Hlum Lo Ding Kilkhawi Dan (Uterine Fibroid)

Nunau zatek 20% ihsin zatek 50% tlukin Nunau Homone Estrogen le Progesterone pawl in nauinn a kelawh țhatnak a bawm thei ruangah nauinn hi a hlum in a umter theinak a si. Mi tampi cu a hlum (bial) kha amahten a compit tivek in a um țheu. Amahten com ih a hlo ahcun a țha a si ko. Asinan, mi hrek cu theihtham tuk loin a um ih a tum vivo țheu. Curuangah ziangtin hithil a suak thei timi kan zoh ding.

  • Nunau dan neih cam(period) ah ni tampi daih ih neihnak
  • Nunau dan a rat can ah a hlan hnakin a tam
  • Nunau dan neih can a dik lo
  • Nunau dan neih tinten a nat dan pangai siloin a nat a luar
  • Cawn (kawng) hram pawl a na
  • Dungzaang tluan pawl a na
  • Pumpi a sa

Himi nauinn hlum(bial), nauinn tom lole nauinn hrang tidai paitu hi pakhat lole pakhat hnak ih tam 3 / 4 lai in a um thei. A hlum fate ihsin a hlum tumpi tiang a um thei ih a umtudan kha a bang aw țheh lo. Ziangtikah kan theithei ti asile a hlum ih tidai a tam hnuah le a hlum pawl a tum tik lawng ah theihtheih a si lai. El na, el kham(Backache or Leg Pains), ke pawl a na, ke a kham ti pawl tuar a si.

Hih a hlum (bial) hi nauinn a sunghram bik ih a um ahcun thlatin dan neih (Heavy Menstrual Bleeding) a tamter ding. Nauinn ih a lenglam ah a um sile thlatin dan neih a dik lo ding ih dan a rat dan khal a hlan hnakin a mal ding.

Hi thil pahnih ih umzia cu a sunghram ih a um sile dan ratnak zin a kauter ih a lenglam ih a um cun dan ratnak zin a fiakter hi a si. Himi a hlum pawl a tum ih zuninn a nen zik asile tuletu zun a suak leuhleuh ding. Rilpi lam a nen deuh asile sung a dokter thei a si.

Nauinn tuamtu vun, tidai paitu ih ruangah thlatin dan neih a tam zet țheutu pawl hi thisen a țumter thei ruangah thitha mal, taksa pawl a rang (ဖြူဖတ်ဖြူရော်) ding. Thawthawt a sam hluahhlo fawn ding. Um huahho men khal in tha a cau ding. Hivek ih a umtu pawl in a thianghlim mi sa, nga, a hringno zet mi hanghnah hangrah pawl ei a țul ih thirdat tel mi siivai (golugose) ei in ding a si.

A hlum hi a tum asile Operation in hlon a țul ih a hlum a fate asile siizung ih hman mi thilri pawl hmang in laksuah a țul. Hivek in hlon țul pawl hi nau an nei thei nawn lo ih vanduai deuh pawl phei cu nauinn zaten hlon țheh țul dinhmun tiang a thleng thei.

Asinan, thinphan ding ciamco cu a si lo. Cancer Cell a si lo ruangah Operation in a țha sal thei mi a si ih hlon țul a si hmanah amahten a sem thei sal mi a si.

Ziangtin kan kham aw thei ding???

  1. Practice tuah țheu aw (teima aw). Taksa zawiawinak (Practice) tuah hi nat ngah lo ding in zate 30% ihsin zatek 40% tiang a kham thei. Practice tuahnak hin himi natnak lawng siloin nat dangdang ngah lo ding in a kham thei fawn.
  2. Hanghnah hangrah ei tam aw. A ruh thawn ei cih theih mi ngasa pawl ei tam aw. Cu pawl lak ih tel mi Vitamin D hin nauinn a hlum pawl um lo ding in zatek 30% lai a khamsak thei ti a si.
  3. Pakhat leh cu taksa khingrihnak (Weight) țhum ding hi a si. Taksa thau (mi thau pawl ti men ding khi sinan hi ca a siartu lakah mi thau nan um pang thei ruangah ka lo hmaisong 😄) hi nauinn nat ngah an olsam deuh ruangah taksa khingrihnak țhum a țulnak a si. Practice tuahnak rori in taksa khingrihnak țhum thei sehla duhum bik a si.
  4. A palinak cu nunau pawl ih Homone Estrogen hi a si. Himi homone pawl in nunau taksa a nonalter thei. Curuangah mi hrekkhat cun an dawt ih an ei an in țheu. A țhenkhat sile zianghman ruat lem cuca loin taksa a mawiter si tiin an ei an in ve. Pianthlakpi vek tein taksa sung ihsin a suak mi Estrogen homone hi kan harhdamnak hrang a țul zat hnak in tam a daiawk sile nauinn hlum pawl a cang duh zet ruangah homone sii dawt le ei hi ralrin thiam a țha. Ei lo le dawt lo kha a țhabik pei cu!
  5. A thupibik cu nauinn hlum kan timi pawl hi a tam sawn cu theihtheih a si lemlo. Amahten a hlo sal thei fawn. Amahten a hlo sal thei mi sile zianghman a poi lo nan a tlun ih kan sim mi nat umtudan vek in kan thei-awk asile Doctor pakhatkhat hnenah feh lohli ding a si.

Nangmah ahkhan dan thi neih dan a dik lo(thi a tam cuang), thlakhat ah vei hnihthum lai dan a ra ti pawl thlatin dik lonak pakhatkhat na theiawk a si ahcun na umnak thawn a naibiknak Doctor pakhatkhat hnenah hmuhawk tum lohli aw. Khua na tlai pang thei a si.

Ziangahtile daithlang in na um ahcun fa nei thei loin simaw, thisen suak a tam ruangah thisen mal nat ti pawl natnak a phunphun a tuar theih ruangah a si.

Culawng siloin naupai lai ah nauinn hlum kan timi pawl a um pang ahcun thlakim loin nau neih a olte fawn. Nau zurh (thi cia ih suak / nau siat) a ol. Cule, nauinn hlum kan timi hi nunau zaten kum bikhiah um loin a ton theih ih dan thi rat dan a dik lo ih pakhatkhat țihnung deuh vek ih theihnak kan neih ahcun Doctor hnen ah feh lohli mai ding a si.Ref: Jeunesse Myanmar. Credit – Salai Christo Pa Bawi

Leave a Comment

error: Content is protected !!